विप्लवसँग शास्त्रार्थमा बस्न प्रचण्ड तयार

२०७७ फाल्गुन २७

काठमाडौँ – माओवादी केन्द्रका अध्यक्ष पुष्पकमल दाहाल प्रचण्डले नेत्र विक्रम चन्द विप्लवसँग शास्त्रार्थमा बस्न आफू तयार भएको बताएका छन् ।

बिहीबार नेपाल प्रज्ञा प्रतिष्ठानमा जनयुद्धका सहिद भरत ढुंगाना स्मृतिग्रन्थ सार्वजनिकीकरण तथा परिचर्चा कार्यक्रममा अध्यक्ष प्रचण्डले विप्लवसँग शास्त्रार्थ गर्न आफू तयार भएको बताएका छन् ।

‘अहिले पनि संसदका लागि मात्रै लड्यो भन्ने तर्क तपाईंहरुले गर्नुभयो । संघीयता, गणतन्त्र, धर्मनिरपेक्षता, उत्पीडित वर्गको जेजति अधिकार प्राप्त भएको छ त्यसलाई निरंकुश बुटले कुल्चन खाज्नेविरुद्धको विद्रोहका रुपमा किन मान्नुहुन्न ?’, प्रचण्डले भने, ‘म शास्त्रार्थका लागि तयार छु, यत्ति भन्न चाहन्छु अहिले । कति दिन बस्नु पर्ने हो, इमान्दारिकताका साथ बसौँ । तपाईंहरुलाई लाग्या होला सबै मैले गुमाइदियो भन्ने । तपाईंहरुले जित्नु भयो भने म पछि लाग्छु ।’

उनले भने, ‘म चिन्तित छु । म आक्रोशित पनि छु । म आफैँ आन्दोलित पनि छु । साथीहरू बिचार गर्नुहोला । हामीले राजनीतिक हिसाबले सामन्तीतन्त्रमाथि विजय हासिल गरेकै हो । तर, राष्ट्रिय स्वधिनताको लडाइँ पूर्ण भएको छैन । हामीले अझै लड्न बाँकी छ भनेको त्यहीँनिर हो ।’

अध्यक्ष प्रचण्डले आफूभित्र आवेग र आक्रोश रहेको र नेपालको स्वतन्त्रता र जनताको आत्मनिर्णयको अधिकारमाथि कसैले धावा बोले नेपाली जनतालाई बिद्रोह गर्ने अधिकार हुने चेतावनीसमेत दिए ।