नेपाल समूहले एमालेको निर्णय नमान्ने, देउवालाई विश्वासको मत दिने

काठमाडौँ – नेकपा एमालेको माधव नेपाल समूहले नेपाली कांग्रेसका सभापति एवं प्रधानमन्त्री शेरबहादुर देउवालाई विश्वासको मत दिने भएको छ ।

मंगलबार राती प्रधानमन्त्रीको शपथ लिएका देउवालाई विश्वासको मत दिने नेपाल समूहले निर्णय गरेको हो । नेपाल पक्षका सांसद मेटमणी चौधरीले देउवालाई प्रधानमन्त्री बनाउन सहयोग गरेकाले संसदमा विश्वासको मत दिने जानकारी दिए ।

‘सरकार बनाउन चाँही सहयोग गर्ने सरकार टिकाउन मत नदिने भन्ने हुँदैन् । मत दिएनौं भने चुनाव हुन्छ । चुनाव भयो भने केपी ओलीले जुन असंवैधानिक काम गरेका छन् त्यो जस्टिफाइ हुन्छ’, उनले भने, ‘देउवालाई प्रधानमन्त्री बनाउने कुरामा हाम्रो भूमिका रह्यो । अब उनलाई पूरै अवधि टिकाउनका लागि मत दिन तयार छौं । हामी उहाँलाई २३ जना भन्दा बढी सांसदको संख्या थपेर मत दिन्छौं ।’

Advertisement

सांसद चौधरीले असार २८ गते सर्वोच्च अदालतले दलका सांसदलाई ह्वीप नलाग्ने आदेश जारी गरेसँगै आफूहरु स्वतन्त्र रहेको बताए । उनले केपी शर्मा ओली जस्तो सन्की मानिस फेरी नजन्मिउन भनेर देउवालाई नै विश्वासको मत दिने स्पष्ट पारे ।

‘संविधानको धारा ७६ को (५) अनुसार दलको ह्वीप नलाग्ने प्रावधान रहेको छ । सर्वोच्चको त्यही अनुसार निर्देशन दिएको छ । संसद पूरै अवधि चलोस् । केपी ओली जस्तो सन्की मान्छेहरु फेरी नजन्मिउन भनेर संसदलाई पूरै अवधि चलाउन खोजेका छौं’, सांसद चौधरीले भने ।

प्रधानमन्त्री देउवाले नियुक्त भएको एक महिनाभित्र प्रतिनिधिसभामा विश्वासको मत लिनुपर्ने संवैधानिक बाध्यता रहेको छ । प्रधानमन्त्री देउवाले विश्वासको मत लिने मिति घोषणा नगरेपनि नेपाल समूहले पक्षमा मतदान गर्ने निर्णय गरिसकेको हो ।

राष्ट्रपति विद्यादेवी भण्डारीले प्रधानमन्त्री केपी शर्मा ओलीको सिफारिसमा गत जेठ ७ गते प्रतिनिधिसभा विघटन गरेर मध्यावधी निर्वाचनको घोषणा गरेकी थिइन् ।

एमालेको माधव नेपाल समूह, विपक्षी दल माओवादी केन्द्र, जनता समाजवादी पार्टी (जसपां उपेन्द्र यादव पक्ष मिलेर कांग्रेसका सभापति देउवालाई प्रधानमन्त्रीमा नियुक्त गर्न माग गर्दै सर्वोच्च अदालतमा रिट दायर गरेका थिए ।