राज्यको सम्पत्ति फिर्ता ल्याउन नसके एक सेकेन्ड पनि पदमा बस्दिनँ : पर्यटनमन्त्री आले

काठमाडौँ — संस्कृति, पर्यटन तथा नागरिक उड्डयनमन्त्री प्रेमबहादुर आलेले आफ्नो मन्त्रालय अन्तर्गतको अतिक्रमणमा परेका राज्यको सम्पत्ति फिर्ता ल्याउन नसके आफू एक सेकेन्ड पनि मन्त्री पदमा नबस्ने बताएका छन् ।

पर्यटन मन्त्रालयमा शुक्रबार आयोजित दोस्रो त्रैमासिक प्रगति समीक्षा र मन्त्रालयस्तरीय समस्या समाधान समितिको बैठकलाई सम्बोधन गर्दै मन्त्री आलेले मातहतका अतिक्रमित सरकारी सम्पत्ति फिर्ता गर्न नसके आफू एक सेकेण्ड पनि पदमा नबस्ने बताएका हुन् । राज्यको दोहन भएको सम्पत्ति फिर्ता ल्याउनु आफ्नो कर्तव्य भएको उनले बताए ।

विगतदेखि नै सरकारी जग्गाहरुमा अतिक्रमण भइरहे पनि सम्बन्धित निकाय टुलुटुलु हेरेर बसेको भन्दै आफूले फिर्ता गराएरै छाड्ने मन्त्री आलेको भनाइ थियो । पदमा बसुन्जेल इमान्दारीपूर्वक देशको लागि काम गर्ने प्रतिबद्धता व्यक्त गर्दै मन्त्री आलेले सरकारी नियुक्ति पाएका कर्मचारीहरुले अन्य व्यक्तिहरुसँग बसेर सेटिङ गरेको भेटिएमा सहृय नहुने चेतावनी पनि दिए ।

Advertisement