सात वर्षअघि बलात्कार भएकी युवतीको घरमा पुग्यो प्रहरी

२०७९ जेष्ठ ६

काठमाडौं । सात वर्षअघि एक सौन्दर्य प्रतियोगिताका आयोजकले नशालु पदार्थ खुवाएर बलात्कार गरेको सार्वजनिक गरेकी युवतीको घरमा प्रहरी पुगेको छ । काठमाडौं उपत्यकामा हुने जघन्य प्रकृतिको अपराध अनुसन्धान गर्ने उपत्यका अपराध अनुसन्धान कार्यालयका एसपी कृष्ण कोइरालाको नेतृत्वमा काउन्सिरलसहितको टोली उनको घरमा पुगेको हो ।

हदम्यादका कारण पीडकमाथि कारबाही नहुने भन्ने सुनेपछि विक्षिप्त अवस्थामा अर्को भिडियो सार्वजनिक भएपछि प्रहरी टोली उनको घरसम्म पुगेर टोलीले पीडितहरुसँग कुराकानी गरिरहेको बताइएको छ ।

बुधबार सामाजिक सञ्जाल टिकटकमार्फत २० वटा भिडियो सार्वजनिक गरेकी युवतीले यसअघि प्रहरीसँग सम्पर्कमा आउन चाहेकी थिइनन् । भिडियो सार्वजनिक भएपछि मानवअधिकारकर्मी र अभियन्ताहरुले उनको खोजी गरेका थिए ।

शुक्रबार संसदमा पनि यो विषयले प्रवेश पाएको छ । काँग्रेस महामन्त्री एवं सांसद गगन थापाले तत्काल छानविन थाल्न सरकारसँग अनुरोध गरेका थिए । सभामुख अग्नि सापकोटाले पनि छानविन गर्न सरकारलाई रुलिङ गरेका छन् ।