एकीकृत समाजवादीको उम्मेदवार बन्न सात शर्त सहितको मापदण्ड

२०७९ भाद्र १

काठमाडौं । नेकपा(एकीकृत समाजवादी)ले आसन्न प्रतिनिधिसभा तथा प्रदेश सभा सदस्य उम्मेदवार हुन सात मापदण्ड तय गरेको छ । बुधबार बसेको पार्टीको केन्द्रीय सचिवालयको ३५औं बैठकले सातवटा मापदण्ड तयार गरेको हो ।

जस अनुसार पार्टीको कार्यदिशा ,नीति र कार्यक्रमप्रति प्रतिबद्ध भएको ,पार्टी निर्माणमा योगदान गरेको र विद्रोहमा सक्रिय भूमिका खेलेको, पार्टी र क्रान्तिप्रतिको निष्ठा र अनुशासनमा दृढ रहेको, आर्थिक र नैतिक आचरण राम्रो भएको, जनतामा स्थापित र लोकप्रिय रहेको, स्वच्छ छवि र सुशासनको पक्षपाती, कार्यक्षमता र सक्रियता राम्रो भएको हुनुपर्ने मापदण्ड तयार भएको महासचिव डा.वेदुराम भुसालले बताए ।

समावेशी समानुपातिकका सिद्धान्तलाई आत्मसात गर्दै सातवटा मापदण्डभित्र रहेर जिल्ला र प्रदेश निर्वाचन कमिटीलाई उम्मेदवार पठाउन बैठकले निर्देशन दिएको छ । भदौ २० भित्र जिल्ला र प्रदेशबाट पठाइएका नाम सिफारिसमा केन्द्रले छलफल गरेर टुंग्याउने भएको छ । यस्तै नेकपा (एकीकृत समाजवादी)ले नेकपा(माओवादी केन्द्र)सँग पार्टी एकताका लागि ‘पार्टी एकता संयोजन समिति बनाउने समेत निर्णय गरेको छ ।

पार्टीका उपमहासचिव डा.गंगालाल तुलाधरले वामहरुको बीचमा एकताको पहल नेकपा(एकीकृत समाजवादी)र माओवादी केन्द्रबाट शुरु हुने भन्दै दुईवटा पार्टीको बीचमा एकता प्रक्रियाका विभिन्न आयामहरूमा कार्य प्रक्रियालाई अघि बढाउने निर्णय भएको बताए । समितिमा पार्टीका शीर्ष नेताहरू अध्यक्ष माधवकुमार नेपाल, सम्मानित नेता झलनाथ खनाल र माओवादी केन्द्रको तर्फबाट अध्यक्ष पुष्पकमल दाहाल लगायतका नेताहरू रहनुपर्ने सुझाव दिएको बताए ।