प्रतिनिधिसभा र चिनियाँ जनकंग्रेसबीच ६ बुँदे समझदारी

२०७९ भाद्र २७

काठमाडौं : नेपालको प्रतिनिधिसभा र जनवादी गणतन्त्र चीनको राष्ट्रिय जनकंग्रेसबीच ६ बुँदे समझदारीपत्रमा हस्ताक्षर भएको छ।

सभामुख अग्नि सापकोटाकाे निमन्त्रणामा चिनियाँ जनकंग्रेसका अध्यक्ष ली चान्शुको औपचारिक नेपाल भ्रमण भएकाे हो। भ्रमणका क्रममा सोमबार दुई देशको संसद्‍बीच समझदारी पत्रमा हस्ताक्षर गरिएकाे हो। समझदारी पत्रमा नेपालका सभामुख अग्नि सापकोटा र चान्शुले हस्ताक्षर गरेका छन्।

समझदारी पत्रमा सन् २०१९ को अक्टोबरमा चिनियाँ राष्ट्रपति सि जिनपिङको भ्रमणका क्रममा नेपाल सरकार र चीनबीच भएको विकास र समृद्धिको लागि चीरकालसम्म मैत्रीपूर्ण द्विपक्षीय सम्बन्धलाई अभिवृद्धि गर्ने निर्णयलाई आधार मान्दै दुई देशका संसद्‌बीच सहयोग र सद्भाव कायम रहने उल्लेख छ।

पत्रमा आपसी विश्वास सुदृढ र विकास गर्ने, एक अर्काको स्वतन्त्रता, सार्वभौमसत्ता र भौगोलिक अखण्डताको सम्मान गर्ने, एक अर्काको स्वतन्त्र रुपमा छनोट गरिएको सामाजिक प्रणाली र विकास पथको सम्मान गर्ने उल्लेख छ।

समझदारी पत्रमा दुई संसद्‌बीच भ्रमणको आदान प्रदान बढाउने, संसद्‌का मैत्री समूहहरूलाई सक्रिय बनाउने जस्ता कुरा पनि उल्लेख गरिएको छ।

समझदारीपत्र