हामीले विद्रोह नगरेको भए संविधानको रक्षा हुने थिएनः डा भुसाल

काठमाडौं । नेकपा (एकीकृत समाजवादी) का महासचिव डा वेदुराम भुसालले आफूहरूले एमालेसँग विद्रोह नगरेको भए संविधान रक्षा नहुने बताए । शनिबार नेकपा एकीकृत समाजवादी काठमाडौं क्षेत्र नं. १ ले आयोजना गरेको दशैँ तिहार छठ नेपाल सम्वत् लगायतका चाडहरुको शुभकामना आदान प्रदान तथा चियापान कार्यक्रममा बोल्दै प्रमुख अतिथि डा भुसालले आफूहरुले त्यस समयमा विद्रोह गरेर प्राप्त उपलब्धी रक्षा गरेको बताए ।

महासचिव भुसालले अबको चुनाव प्रतिगमन र अग्रगमन बीचको टकराव भएको भन्दै जनताको मौलिक अधिकारसहित सिंगो प्रणालीको रक्षाका खातिर पनि गठबन्धनको जरुरी रहेको बताए ।

स्थानीय निर्वाचनमा मतदाता शिक्षाको अभावकै कारण थुप्रै मत बदर भएको स्मरण गर्दै महासचिव भुसालले त्यस तर्फ ध्यान दिन र मतदाता शिक्षालाई व्यवस्थित गर्न कार्यकर्ताहरूलाई निर्देशन दिनुभयो ।

Advertisement

उनले आगामी चुनावले पार्टीको शक्ति र हैसियतलाई सुढृड गर्न र त्यसका लागि प्रत्यक्ष सहित समानुपातिकतर्फ पार्टीको कलम चुनाव चिन्हमा मतदान गर्न अभिप्रेरित गर्दै गठबन्धनका उम्मेदवारहरूलाई जिताउन लाग्न सम्पूर्ण नेता कार्यकर्ताहरूलाई निर्देशन दिए ।