मिटरब्याज पीडितमाथि भएको दमनविरुद्ध ‘मानव-अधिकार मार्च’ गर्दै बृहत् नागरिक आन्दोलन

२०८० बैशाख ५

काठमाडौं । मिटरब्याज पीडितमाथि भएको दमनविरूद्ध बृहत् नागरिक आन्दोलनले ‘मानव-अधिकार मार्च’ गर्ने भएको छ। नागरिक आन्दोलनले बुधबार बुधबार दिउँसो ३ बजे शान्तिवाटिकादेखि संसद भवनसम्म मार्च गर्न लागेको हो।

नागरिक आन्दोलनले मिटरब्याज पीडितहरूमाथि सोमबार प्रहरीले गरेको अनावश्यक, निर्मम र अमानवीय दमनप्रति गम्भीर ध्यानाकर्षण भएको जनाएको छ।

मंगलबार एक विज्ञप्ति जारी गर्दै नागरिक आन्दोलनले भनेको छ, ‘उक्त दमनका दौरान प्रहरीले शान्तिवाटिकाको पर्खालभित्र थुनेर अश्रुग्याँस र पानीको फोहोराले प्रहार मात्र गरेन, शान्तिपूर्ण ढंगले विरोध प्रदर्शनका निम्ति शान्तिवाटिकाबाट निस्कन लागेका महिलाहरूलाई लछारपछार गरेर, किसान-मजदुरहरूलाई टाउकोमा ताकेर लठ्ठी प्रहार गर्ने अमानवीय कृत्यसमेत गर्यो ।’

नागरिक आन्दोलनले उक्त घटना मानव अधिकारको हनन् भएको बताउदै दोषीहरूको छानबिन गरी कारबाही गर्नसमेत माग गरेको छ।विज्ञप्तिमा भनिएको छ, ‘शान्तिवाटिकाबाट समातिएका पीडितहरूलाई प्रहरीले महेन्द्र पुलिस क्लबभित्र लगेर थप कुटपिट मात्र गरेन, उपचार गर्नुपर्ने बिरामीलाई दिनभरि हिरासतमा थुन्ने कार्य समेत गर्यो। यो घटना गम्भीर मानव-अधिकारको हनन् हो। यसरी मानव–अधिकार उल्लंघन गर्ने दोषीहरूको छानबिन गरी कारबाही गर्न जोडदार माग गर्दछौं ।’