आयोगमा दर्ताका लागि निवेदन दिएका सबै दलको आजबाट जाँच हुने

२०७९ भाद्र १

काठमाडौं । निर्वाचन प्रयोजनार्थ आयोगमा दर्ताका लागि निवेदन दिएका सबै दलको आजबाट जाँच हुने भएको छ । मंगलबार निर्वाचन आयोगमा दल दर्ता निवेदन गर्न पुगेका दलहरुको बारेमा जानकारी गराउँदै निर्वाचन आयोगले आजबाट जाँच सुरु हुने बताएको हो ।

निर्वाचन आयोग, नेपालका प्रवक्ता शालिग्राम शर्मा पौडेलका अनुसार आगामी मंसिर ४ गते हुने प्रदेश र प्रतिनिधि सभाको निर्वाचन प्रयोजनार्थ आयोगमा दल दर्ताको निवेदन दिएका सबै दलहरुको बुधबारबाट जाँचपरक गर्ने, हेर्ने, कानून बमोजिम छन् कि छैनन् ? प्राप्त गर्नुपर्ने सबै कागजात छ कि छैन भन्नेकुराको परीक्षण सुरु हुने भएको छ ।

सबै कुराको परीक्षण गरेर दलहरुलाई दर्ताका लागि आयोगमा पेस गर्ने काम सुरु हुने उनले बताए । आयोगले निर्णय गरेपछि, कानूनसम्मत आयोगले ठहर गरेको खण्डमा आगामी निर्वाचन प्रयोजनका लागि दलहरु दर्ता हुने उनले जानकारी दिए ।