हृदयघात भएको आठ महिनापछि इरिक्सन मैदानमा

२०७८ फाल्गुन ३

काठमाडौं । हृदयघात भएको आठ महिनापछि ब्रेन्टफोर्टका मिडफिल्डर क्रिस्टीयन इरिक्सन साउदर्न उनाईटेड–११ विरुद्धको मैत्रीपूर्ण खेलका लागि मैदानमा उत्रिए ।

इन्टर मिलानले रिलिज गरेपछि डेनमार्कका ३० वर्षीय इरिक्सनले गत महिना ब्रेन्टफोर्टमा आवद्ध भएका थिए । ब्रेन्टफोर्टले साउदर्न उनाईटेडलाई ३–२ ले पराजित गर्दा इरिक्सनले १ घण्टा मैदानमा विताएका थिए ।

इरिक्सनले एक गोलका लागि अवसर समेत सृजना गरेका थिए । डेनमार्कका लागि युरो २०२० अन्तर्गत फिनल्यान्डविरुद्ध खेल्ने क्रममा इरिक्सन सन् २०२१ जुन १२ मा मैदानमै अचेत भएका थिए ।

उनलाई अस्पताल लैजानु अघि सीपीआर दिइएको थियो । इरिक्सनलाई पछि इम्पलान्टेवल कार्डियोभर्टर डिफिब्रिलाटर (आइआरडी) लगाइएको थियो । इटालीको सिरि ए अन्तर्गत आइआरटी लगाएका खेलाडीहरुले खेल्न नपाउने प्रावधान रहेको छ ।

सोही अनुसार इन्टर मिलान र इरिक्सनले आपसी समझादारीमा सम्झौता तोडेका थिए । तर इंग्लीस प्रिमियर लिगमा भने सो प्रावधान रहेको छैन ।