सहकारीको पैसा तिर्न चाहनेलाई मौका दिने गरी अगाडि बढ्न आवश्यक छ: गृहमन्त्री लामिछाने

काठमाडौं। उपप्रधान एवं गृहमन्त्री रवि लामिछानेले सहकारीको पैसा तिर्न चाहनेलाई मौका दिने गरी अगाडि बढ्न आवश्यक रहेको बताएका छन् ।

शुक्रबार सहकारी बचतकर्ता संरक्षण अभियान (महासंघ) का अध्यक्ष कुशलव केसीलगायतका अभियन्ताहरुसँग छलफल गर्दै उनले भने, ‘हामीले यो पनि भनेका छौं, कोही मान्छे तिर्न चाहने मानिसहरु पनि छन् । म तिर्छु, म मिलाउँछु भन्न चाहनेहरुलाई, कोही होलान् नि त्यस्तो, जसले म तिर्न चाहन्छु, मसँग क्षमता छ, दायित्व २ अर्बको छ, सम्पत्ति ५ अर्बको छ भने त तिर्न सक्ला नि । त्यस्ताहरुलाई समेत सम्बोधन गरौं ।’

गृहमन्त्री लामिछानेले सहकारीका कारण धेरै मानिसहरू पीडित भनेका र आत्महत्या गर्नेसम्मको अवस्थामा पुगेको भन्दै यस्तो बेला विधि, प्रक्रिया र अभ्यास भन्दा पनि फास्ट ट्रयाकबाट सम्बोधन गरिनुपर्ने बताए ।

Advertisement

उनले भने, ‘सहकारी र लघुवित्त पीडितका लागि यो संकटकाल हो । लाखौं मान्छे संकटमा परेका छन् । संकटकाल कस्तो रुपमा आउँछ, कुन ढंगको हुन्छ ? हामीले देख्दै, सुन्दै आएको बेग्लै होला । तर, पीडितहरु आत्महत्या गर्नुपर्ने आवस्थामा पुगिसकेका छन्, उपचार गर्नुपर्ने आवस्थामा आएका छन् । त्यसकारणले जनता संकटमा परेको बेला विधि, प्रक्रिया र अभ्यासको भारी बोक्नु हुँदैन, फास्ट ट्रयाकमा गर्नुपर्छ भनेर हामी लागिपरेका छौं।’

सहकारी ठगी मुद्दामा फरार रहेका, प्रमाणित भएका मानिसहरुको सम्पत्ति रोक्का राखेर न्याय दिने मानिसहरुको सम्पत्ति रोक्का गरेर न्याय दिने क्रमको सुरुवात हुने पनि गृहमन्त्री लामिछानेले बताए ।