भूकम्प प्रभावितका लागि राहत पठाउन सरकारले उपेक्षा गरेको छैन: उपप्रधानमन्त्री श्रेष्ठ

२०८० कार्तिक २६

काठमाडौं । उपप्रधानमन्त्री एवं गृहमन्त्री नारायणकाजी श्रेष्ठले भूकम्प प्रभावितका लागि राहत पठाउन सरकारले उपेक्षा नगरेको दाबी गरेका छन् । विपद् जोखिम न्यूनीकरण तथा व्यवस्थापन कार्यकारी समितिको १९ औँ बैठकलाई सम्बोधन गर्दै उनले जाजरकोट, रुकुम पश्चिम र बझाङका भूकम्प प्रभावितका लागि राहत पठाउन सरकारले उपेक्षा नगरेको बताएका हुन् ।

भुकम्पपछि सरकारले कत्तिपनि ढिलो नगरी त्रिपाल, टेन्ट, म्याट्रेस, ब्ल्यांकेट र खाद्यान्न पठाएको र पठाउने क्रम जारी रहेको उपप्रधानमन्त्री श्रेष्ठले बताए । सरकारसँग भएको साधन र स्रोतकाअनुसार राहत पठाइरहेको उनको स्पष्टीकरण थियो ।

यस्तै, आवश्यकताअनुसार चिकित्सक, स्वास्थ्य उपकरण र औषधि पनि उपलब्ध गराइएको पनि उनले जानकारी दिए । उनले भने, ‘हामीले एक क्षण, एक सेकेन्ड ढिलो नगरीकन हामीले पठाउन सकिने सम्पूर्ण त्रिपाल, टेन्ट, म्याट्रेस, ब्ल्यांकेट, खाद्यान्न पठाइराखेका छौँ । राहतमा हाम्रो ध्यान गएको छ । हामीले हाम्रो साधन, स्रोतले सामानहरुको हकमा हामीले व्यवस्था गरेका छौँ तर पुर्‍याउने साधन त चाहियो । स्काइ भ्यान प्रयोग गरेपनि सुर्खेतसम्म जान्छ, सबै ठाउँमा जाँदैन । सुर्खेतबाट क्यारी गर्नैपर्‍यो । सरकारले जतिसुकै तदारुकता देखाएपनि एकैचोटी पहिलो दिन सबै ठाउँमा त्रिपाल, सबै ठाउँमा म्याट्रेस, सबै ठाउँमा ब्ल्यांकेट पुर्‍याउन सक्ने स्थितिमा हुँदैनौँ ।’