कुलमान लगायतलाई कार्यालय प्रवेशमा रोक लगाउने घोषणा गरेका ट्रेड युनियनहरूको आन्दोलन फिर्ता

२०८० कार्तिक १९

काठमाडौं । नेपाल विद्युत प्राधिकरणका कार्यकारी निर्देशक कुलमान घिसिङ लगायतलाई कार्यकक्षमा प्रवेश निषेध गर्ने घोषणा गरेका ट्रेड युनियनहरू र नेपाल विद्युत प्राधिकरण व्यवस्थापनबीच सहमति भएको छ। व्यवस्थापनले आफूहरूका माग सम्बोधन गर्ने सहमति गरेसँगै युनियनले आन्दोलन फिर्ता गरेको छ ।

ट्रेड युनियनहरूले गरेको सात बुँदे मागका सम्बन्धमा आधिकारिक ट्रेड युनियनको प्रतिनिधि समेत रहने गरी जनसाधन विभाग निर्देशकको अध्यक्षतामा पाँच सदस्यीय कमिटी गठन गर्ने निर्णय भएको बताइएको छ । उक्त कमिटीले आवश्यक अध्ययन गरी रायसिफारिससहित प्रतिवेदन कुलमान घिसिङलाई पेस गर्नेछ।

व्यवस्थापनले असोज ३० गते भएको सरूवा काजमा पुनरावलोकन गर्ने तथा सच्याउने सहमति गरेको छ।

ट्रेड युनियनहरू विभिन्न सात बुँदे माग अघि सार्दै कात्तिक १२ गतेदेखि आन्दोलनरत थिए।

कार्यकारी निर्देशक कुलमान घिसिङ लगायत उपकार्यकारी निर्देशक प्रशासन, जनसाधन विभागका निर्देशक र सम्पूर्ण प्रादेशिक कार्यालय प्रमुखहरूलाई समेत कार्यकक्षमा प्रवेश निषेध गर्ने घोषणा गरेको ट्रेड युनियनहरू र नेपाल विद्युत प्राधिकरण व्यवस्थापनबीच सहमति भएसँगै आन्दोलन स्थगित भएको हो ।

प्राधिकरण कर्मचारी युनियन र नेपाल विद्युत प्राधिकरण कर्मचारी संघले आइतबार, सोमबार र मंगलबार तीन दिन कार्यकारी निर्देशक, उपकार्यकारी निर्देशक प्रशासन, जनसाधन विभागका निर्देशक र सम्पूर्ण प्रादेशिक कार्यालय प्रमुखहरूलाई कार्यकक्षमा प्रवेश निषेध गर्ने निर्णय गरेका थिए।