ठोरी गाउँपालिका मधेसकै पहिलो पर्यटकीय गन्तव्य घोषणा

२०७८ चैत्र ११

जनकपुर । मधेस प्रदेश सरकारले पर्साको ठोरी गाउँपालिकालाई प्रदेशकै पहिलो पर्यटकीय गन्तव्य घोषणा गरेको छ । शुक्रबार पर्साको ठोरीस्थित जंगल रिसोर्टमा रुख मुनि बसेको मधेस प्रदेश सरकारको मन्त्रिपरिषद् बैठकले ठोरी गाउँपालिकालाई पहिलो पर्यटकीय क्षेत्र घोषणा गरेको हो ।

बैठकपछि सञ्चारकर्मीहरुसँग संक्षिप्त कुराकानी गर्दै मुख्यमन्त्री लालबाबु राउतले ठोरीलाई पर्यटकीय गन्तव्यका रुपमा विकास गर्न सहयोग पुर्याउन प्रदेश सरकारले १० करोड रुपैयाँ ठोरी गाउँपालिकालाई दिने निर्णय गरिएको जानकारी दिए ।

‘पर्यटकलाई लोभ्याउन पूर्वाधार निर्माणसहितको कार्यक्रम गर्न ठोरी गाउँपालिकालाई १० करोड रुपैयाँ दिने निर्णय गरेका हौं,’ उनले भने, ‘यो आर्थिक वर्षमै निर्णय गरिएको बजेटबाट उपलब्ध गराउने प्रयास गर्छौँ ।’

यस वर्ष दिन नसकिए आगामी आर्थिक वर्षमा पूरै रकम उपलब्ध गराइने उनले जानकारी दिए । ठोरी गाउँपालिकालाई पर्यटकीय क्षेत्र बनाउन मधेस सरकारले पहिलो निर्णय गरेको उनले जानकारी दिए ।