महाकाली मेची युवा जागरण अभियानलाई काभ्रेको बनेपामा भव्य स्वागत

२०७९ भाद्र २४

काभ्रे । महाकाली मेची जागरण अभियान टोलीलाई काभ्रेको बनेपामा भव्य स्वागत भएको छ ।

युवा संघ नेपालको महाकाली मेची जागरण अभियान टोलीलाई काभ्रेको बनेपामा भव्य स्वागत गरिएको हो । टोलीलाई पूर्वको मेचीबाट कार्यक्रम सकेर काठमाडौँ फर्कँदै गर्दा बनेपामा स्वागत गरिएको हो । युवा सङ्घ नेपालको टोली बिहान १० बजे बनेपा पुगेको थियो ।

जागरण अभियानका टोलीलाई जिल्ला कमिटी सचिव गोकुल गौतमले खादा र टिका लगाएर स्वागत गरेका थिए । स्वागत कार्यक्रममा पार्टीका अन्य जनवर्गीय संगठन प्रमुखहरूको साथै नेता कार्यकर्ताहरूको बाक्लो उपस्थिति रहेको थियो ।

युवा जागरण अभियान सकेर काठमाडौँ फर्कँदै गर्दा काभ्रेको बनेपामा एकीकृत समाजवादीका नेता कार्यकर्ताले भव्य स्वागत गर्दा आफूलाई गर्व महसुस भएको युवासंघ नेपालका केन्द्रीय सचिव भेषराज शाहले खुशी व्यक्त गरेका थिए ।

बनेपाको चार दोबाटोमा भएको कोणसभामा सम्बोधन गर्दै विद्यार्थी नेता बदन भण्डारीले जागरण अभियानले पूर्व मेचिदेखि पश्चिममा कालीसम्म नेकपा (एकीकृत समाजवादी)का नेता कार्यकर्तालाई उत्साह थपेको बताए ।

आगामी दिनमा पनि अन्याय, अत्याचार, भ्रष्टाचार र निरङ्कुशताका विरुद्ध यस्ता जागरण अभियानहरू सञ्चालन गरी जनतालाई यथार्थ कुराको जानकारी गराउनुपर्ने कुरामा नेता भण्डारीको विशेष जोड थियो ।