मिलन पाण्डे समूहले गर्‍यो रवीन्द्र मिश्र र निर्वाचन आयोगविरूद्ध सर्वोच्चमा मुद्दा दर्ता

काठमाडौं । विवेकशील साझा पार्टीका केन्द्रीय संयोजक मिलन पाण्डे समूहले पार्टीका अर्का संयोजक (अध्यक्ष) रवीन्द्र मिश्र र निर्वाचन आयोगविरूद्ध सर्वोच्च अदालतमा मुद्दा दर्ता गरेको छ ।

पाण्डेले पार्टीको एकीकरण घोषणापत्र र विधान खारेज गर्ने, सम्झौतापत्र अनुरूप एकता महाधिवेशन छल्ने, पार्टीको विधान र संविधान विरोधी दस्ताबेज ल्याएर आफूमाथि अवैधानिक कारबाही गर्ने अध्यक्ष रवीन्द्र मिश्र र मिश्रका अप्रमाणित माइन्युट अभिलेख गर्ने निर्वाचन आयोगविरूद्ध मुद्दा दर्ता गराएका हुन् ।

२०७८ भदौ १७ गतेपश्चात् विवेकशील साझा पार्टीको विधान – २०७४ (पहिलो संशोधन) खारेजी, नयाँ विधान २०७८ जारी र केन्द्रीय सदस्यहरूको राजीनामा स्वीकृति तथा केन्द्रीय संयोजक मिलन पाण्डे उपरको कारबाहीको निर्णय बदर गर्दै त्यस पूर्वको विधि, विधान र प्रक्रियाको आधारमा पार्टीलाई सञ्चालन गर्नू÷ गराउनू भनी विपक्षीहरूका नाममा परमादेशको माग गरिएको छ ।

Advertisement

यस्तै २०७८ भदौ १७ पश्चात् विवेकशील साझा पार्टीको नाममा रवीन्द्र मिश्रले गरेका निर्णय र प्रस्तुत गरेका दस्ताबेजलाई निर्वाचन आयोगले दिएको मान्यता समेत उत्प्रेषणको आदेशले बदर गरी पाऊँ भनी माग गरिएको छ ।